பொம்மலாட்டமும், முட்டாள் பார்வையாளர்களும்!

Share

தமிழக அரசின் தலைமை தகவல் ஆணையர் நியமனத்தை எதிர்த்து சென்னை உயர்நீதி மன்றத்தில், கடந்த மார்ச் மாதம் வழக்கு தொடரப்பட்டது. விஜயலட்சுமி என்ற வழக்கறிஞர் இந்த பொது நல மனுவை தாக்கல் செய்திருந்தார். மாநில தகவல் ஆணையத்தின், தலைமை ஆணையர் நியமனத்தில், அப்போதைய எதிர்கட்சி தலைவர் ஜெயலலிதாவின் கருத்து கேட்கப்படவில்லை என்றும், ஆகவே சட்டப்படி இந்த நியமனம் செல்லாது என்றும், விஜயலட்சுமி தன் மனுவில் கூறியிருந்தார். இதே விஜயலட்சுமி, மாநில தகவல் ஆணையர்களாக, மூன்று பேர் நியமனம் செய்யப்பட்டதை எதிர்த்து மற்றொரு வழக்கும் தொடர்ந்தார். இந்த வழக்கிலும், ஆணையர்கள் நியமனத்தில் எதிர்கட்சி தலைவரின் கருத்து கேட்கப்படவில்லை, ஆகவே நியமனத்தை செல்லாது என, நீதி மன்றம் அறிவிக்கவேண்டும் என கோரி இருந்தார். 

இந்த இரண்டு மனுக்களையும் விசாரணைக்கு ஏற்றுகொண்ட நீதி மன்றம் அப்போதைய தி.மு.க அரசை, இதுகுறித்து பதில் அளிக்க உத்தரவிட்டிருந்தது. இதற்கிடையில், தேர்தல் வந்துவிட்டதால் இந்த வழக்குகள் விசாரணைக்கு வரவில்லை. தற்போது இந்தவழக்குகளில், ஜெயலலிதா தலைமையிலான தமிழக அரசு பதில் அறிக்கை தாக்கல் செய்துள்ளது. அந்த அறிக்கைகள், சம்பந்தப்பட்ட துறையின் செயலாளரால் தாக்கல் செய்யப்பட்டுள்ளது. அந்த அறிக்கைகளில், தலைமை தகவல் ஆணையர் நியமனத்திற்கு முன், அப்போதைய எதிர்கட்சி தலைவர், ஜெயலலிதாவுக்கு தெரிவிக்கப்பட்டதாகவும், அதற்கு ஜெயலிதா எழுதிய பதில் கடிதத்தில், தேர்தல் நெருங்குவதாலும், அப்போதைய இந்திய அரசின் தலைமை கண்காணிப்பு ஆணையர் (பி.ஜே.தாமஸ்) தொடர்பான வழக்கு உச்சநீதிமன்றத்தில் நிலுவையில் இருப்பதாலும், மாநில தலைமை தகவல் ஆணையர் நியமனத்தை தேர்தலுக்கு பின் நடத்தலாம் என்றும் கூறியதாக தெரிவிக்கபட்டுள்ளது. ஆனால் ஜெயலிதாவின் கோரிக்கையை நிராகரித்த தி.மு.க அரசு, எதிர்கட்சி தலைவர் வராமலேயே தலைமை தகவல் ஆணையராக ஸ்ரீபதியை நியமித்ததாகவும் கூறப்பட்டுள்ளது. மூன்று தகவல் ஆணையர்கள் நியமனம் தொடர்பாக, ஜெயலிதாவுக்கு தெரிவிக்கப்பட்டபோது, பரிசீலினையில் உள்ள நபர்களின் பட்டியலை அவர்கேட்டதாகவும், அதை அப்போதைய அரசு தரமறுத்ததால் நியமன கூட்டத்தில் அவர் கலந்து கொள்ளவில்லை என்றும் கூறப்பட்டுள்ளது. 

நீதி மன்றத்தில் தாக்கல் செய்துள்ள பதில் மனுவில் இவற்றை சுட்டி காட்டியுள்ள, அரசு செயலாளர்கள், முந்தைய அரசால் நியமிக்கப்பட்ட, தலைமை தகவல் ஆணையர் மற்றும் மூன்று ஆணையர்கள் நியமனம் சட்டத்துக்கு எதிரானது என்று கூறியுள்ளனர். ஆகவே இவர்களின் நியமனம் செல்லாது என்று கூறியுள்ளனர். இதேபோல், சமச்சீர் கல்வி வழக்கில், அரசின் தலைமை செயலாளர், உயர் நீதிமன்றத்தில் தாக்கல் செய்த பதில் மனுவில், சமச்சீர் கல்வி தொடர்பாக கடந்த அரசு எடுத்த "கொள்கைமுடிவு" சட்டவிரோதமானது என்று கூறியுள்ளார். இன்னும் வெளிப்டையாக, ஜெயலலிதா மீதான சொத்து குவிப்பு வழக்கை, "மாநில கண்காணிப்பு மற்றும் ஊழல் தடுப்பு இயக்குனரகம்" மீண்டும் விசாரிக்க வேண்டும் என்று, அரசின் தலைமை செயலாளர், அரசானை ஒன்றை பிறப்பித்துள்ளார். ஜெயலலிதா மீதான சொத்துகுவிப்பு வழக்கு பெங்களூரு சிறப்பு நீதிமன்றத்தில் நடைபெற்று வரும் நிலையில், தலைமை செயலாளர் இப்படி ஒரு உத்தரவை பிறப்பிப்பதன் உள்நோக்கம், ஜெயலிதாவை காப்பாற்றுவதை தவிர வேறு என்னவாக இருக்க முடியும்? கற் 

இனிவரும் காலங்களில், துறை செயலாளர்கள் பிறப்பிற்க்க உள்ள உத்தரவின் மூலம், ஜெயலலிதா மீது தொடரப்பட்ட அவதூறு வழக்குகள் அனைத்தும் ரத்து செய்யப்படும் (அது எளிதில் நடக்க கூடியது). ஒவ்வொரு அரசும் மாறும்போதும், அதிகாரிகள் தங்களுக்கு சாதகமாக செயல்பட நிர்பந்திக்கபடுவது என்பது இயல்பே. ஆனால் இந்தளவுக்கு வெளிப்படையாக அதிகாரிகளின் கைகளில் கட்டப்பட்ட கையிற்றை ஆட்டுவது, மக்களை முட்டாள்கள் என்று நினைப்பவர்களால் மட்டுமே செய்யமுடியும். 

நாம் உண்மையில் முட்டாள்களா?

அசீப் 

சமச்சீர்: பிழைக்குமா?

Share

சமச்சீர் கல்வியை நிறுத்திவைப்பதாக அரசு எடுத்த முடிவுக்கு எதிர்ப்பு தெரிவித்து சென்னை உயர்நீதி மன்றத்தில் தொடரப்பட்ட வழக்கில் விசாரணை முடிவுற்று, தீர்ப்பு ஒத்திவைக்கப்பட்டுள்ளது. இதுவரை நீதிமன்றத்தில் அரசு தரப்பிலும், மாணவர்கள் மற்றும் பெற்றோர் தரப்பிலும் எடுத்துவைக்கபட்ட வாதங்களை காண்போம். 

அரசு தரப்பை பொறுத்தவரையில், சமச்சீர் கல்வியை இந்த ஆண்டு நிறுத்திவைப்பதற்கு அவர்கள் கூறும் முக்கிய காரணம், 

• சமச்சீர் புத்தகங்கள் தரம் குறைவாக உள்ளது.
• தனிப்பட்ட நபரை, துதிபாடும் வகையில் சில விஷயங்கள் சேர்க்கப்பட்டுள்ளன.
• மத்திய அரசின், வழிகாட்டுதலுக்கு இணங்க பாடத்திட்டங்கள் வகுக்கப்படவில்லை. அதாவது, "தேசிய பாடத்திட்ட வரையறை குழு" வகுத்துள்ள வழிகாட்டுதல்கள், சமச்சீர் பாடத்திட்டம் தயாரிக்கும்போது கணக்கில் எடுத்து கொள்ளபடவில்லை.
•  மத்திய அரசின் "அனைவருக்கும் கல்வி உரிமை" சட்டத்திற்க்கு எதிராக, சமச்சீர் கல்வி சட்டம் உள்ளது, கல்வி, பொதுப்பட்டியலில் உள்ளதால், மத்திய அரசின் சட்டத்தை முழுமையாக நடைமுறை படுத்தாமல், சமச்சீர் சட்டம் நிறைவேற்றபட்டது சட்ட விரோதம்.
• ஏற்க்கனவே, சமச்சீர் சட்டத்தை எதிர்த்து தொடரப்பட்ட வழக்கில், சமச்சீர் கல்வியை நடைமுறை படுத்தும் முன், அரசு எடுக்கவேண்டிய நடவடிக்கைகளாக, உயர்நீதி மன்றம் வகுத்து கொடுத்த வழிமுறைகள் எதுவும், முந்தைய அரசால் கடைபிடிக்க படவில்லை. 
• கல்வி, பொது பட்டியலில் உள்ளதால், கல்வியை பொறுத்தவரையில், மத்திய அரசுக்கு எதிராக மாநில அரசு சட்டம் இயற்ற முடியாது. 
• சமச்சீர் புத்தகங்களில், ஏராளமான சொல் மற்றும் கருத்து பிழைகள் உள்ளன.
• அரசு பள்ளியில் படிக்கும் மாணவர்கள், சமச்சீர் பாடத்திட்டம் சுமையாக இருக்கும். (அதாவது, அரசுப்பள்ளி மாணவர்களின் சிறு, மூளைக்கு ஏற்ற வகையில் சமச்சீர் பாடத்திட்டம் இல்லை)
• சமச்சீர் குறித்து ஆராய்வதற்காக, உச்சநீதி மன்றத்தின் உத்தரவின்படி தமிழக அரசால் அமைக்கப்பட்ட குழுவில் இடம்பெற்ற, ஒய்.ஜி.பார்த்தசாரதி கல்விக்காக தன் வாழ்க்கையை அர்ப்பணித்தவர். ஜெயதேவ் என்பவர் ஏழை மாணவர்களுக்காக இலவச பள்ளி நடத்திவருபவர். விஜயலட்சுமி ஸ்ரீநிவாசன் என்பவர், மாநில பாடத்திட்டத்தின் கீழ் இயங்கும் கல்வி நிலையத்தை நடத்தி வருபவர்.
• இந்த குழு, நான்கு முறை மட்டுமே கூடியதாகவும், அதற்க்குள் 10400 பக்கங்கள் கொண்ட சமச்சீர் புத்தகங்கள் அனைத்தையும் படித்து முடித்தது எப்படி என்று எழுப்பப்பட்ட கேள்விக்கு, குழு நான்கு முறைதான் கூடி இருந்தாலும், குழுவில் உள்ளவர்கள் தினமும் இரவு, பகல் பாராமல் தங்கள் வீட்டில் இருந்தபடி சமச்சீர் புத்தகத்தை ஆராய்ந்ததாக கூறப்பட்டுள்ளது.  

பெற்றோர் மற்றும் மாணவர்கள் தரப்பில் எடுத்து வைக்கப்பட்ட வாதங்கள்.

• சமச்சீர் கல்வியை நடைமுறை படுத்துவது குறித்து ஆராய்வதற்காக, உச்சநீதி மன்றத்தின் உத்தரவுபடி, தமிழக அரசால் அமைக்கப்பட்ட குழுவில் இடம்பெற்ற அனைவரும், கல்வியாளர்கள் அல்ல. மாறாக, கல்வியை கொண்டு வியாபாரம் நடத்துபவர்கள்(ஒய்.ஜி.பார்த்தசாரதி, ஜெயதேவ், விஜயலட்சுமி ஸ்ரீனிவாசன்)
• குழுவில் இடம்பெற்ற அனைவரும், முன்னதாக சமச்சீர் கல்வியை எதிர்த்தவர்கள்.
• சமச்சீர் கல்வி சட்டத்தில் கொண்டுவரப்பட்ட திருத்தம், சமச்சீர் கல்வியை மீண்டும் எப்போது நடைமுறை படுத்துவது என்பது குறித்து கூறவில்லை. ஆகவே, அரசு நிரந்தரமாக சமச்சீர் கல்வியை நிறுத்த நினைக்கிறது. 
• அரசு பள்ளி மாணவர்களுக்கு சமச்சீர் கல்வி பாடத்திட்டம் சுமையாக அமையும் என்பது ஏற்றுகொள்ள முடியாத வாதம்.
• சமச்சீர் குறித்து ஆராய்வதற்காக அமைக்கபட்ட குழுவின் தலைவரும், தமிழக அரசின் தலைமை செயலாளருமான, தேவேந்த்ரநாத் சாரங்கி, ஏற்கனவே நீதிமன்றத்தில் அரசு சார்பாக தாக்கல் செய்த மனுவில், சமச்சீர் குறித்து முந்தைய அரசு எடுத்த கொள்கை முடிவு சட்டவிரோதம் என்று கூறியுள்ளார். அப்படிபட்டவர் எப்படி நடுநிலைமையாக இருந்து சமச்சீர் கல்வியை நடைமுறை படுத்துவது குறித்து ஆராய்ந்திருப்பார்.
• குழுவின் இறுதி அறிக்கையை முடிவு செய்தவர் தலைமை செயலாளர்தான். குழுவில் இருந்த மற்ற நபர்களுக்கு அந்த அறிக்கை காண்பிக்க படாமலேயே அவர்களிடம் கையெழுத்து பெறப்பட்டுள்ளது. 
• குழுவின் அறிக்கை, அரசின் எண்ணத்தை பிரதிபலிக்கும் வண்ணம் உள்ளது. அல்லது, அரசுக்கு ஆதரவாக அறிக்கை அளிக்கும்படி, குழு உருவாக்க பட்டுள்ளது.

இதுதவிர சில விஷயங்கள்.....

• சமச்சீர் கல்வியை நடைமுறை படுத்துவது குறித்து ஆராய்வதற்காக அமைக்கப்பட்ட குழுவில் இடம்பெற்ற, ஒரு நபருடன், தனியார் பள்ளிகளின் கூட்டமைப்பின் தலைவர் கிறிஸ்துதாஸ், ஒன்றாக சுற்றி திரிந்ததை எங்கள் செய்தியாளர்கள் பலமுறை நேரில் பார்த்துள்ளனர்.
• நீதிமன்றம் இன்னும் தீர்ப்பு வழங்காத நிலையில், பழைய பாடத்திட்டங்களின் அடிப்படையில் புத்தகங்கள் அச்சடிக்கும் பணியை அரசு செய்துவருகிறது. இதுகுறித்து செய்தித்தாள் ஒன்றில் வெளிவந்த செய்தியை சுட்டிகாட்டி, தலைமை நீதிபதி, அரசுதரப்பு வழக்கறிஞரிடம் கேட்டபோது, அதாவது, இது நீதி மன்ற அவமதிப்பு இல்லையா என்று நீதிபதி கேட்டபோது, அரசு தரப்பு சரியான விளக்கத்தை கொடுக்கவில்லை, மேலும் அந்த செய்தி குறித்து மறுப்பும் தெரிவிக்க வில்லை.

இந்நிலையில், நாளை மறுநாள் சமச்சீர் கல்வியை இந்தவருடம் நடைமுறை படுத்தலாமா, இல்லையா என்பது குறித்து, சென்னை உயர்நீதி மன்றம் தீர்ப்பு வழங்க உள்ளது. 

அசீப் 

ஒரு வேண்டுகோள்!

Share

நண்பர்களே!

கடந்தவாரம் நம் தோழர்கள் சந்திப்பின்போது, நாம் ஏற்கனவே யோசித்துவைத்தபடி ஒரு புத்தகத்தை அனைவரும் வாசித்து அது குறித்து வரும் வாரங்களில் விவாதம் நடத்தலாம் என்று முடிவெடுத்தனர். அதன் அடிப்படையில், அ.மார்க்ஸ் எழுதிய "ஆரிய கூத்து " என்ற புத்தகத்தின் முதல் இரண்டு தலைப்புகளை வரும் வாரம் விவாதிக்கலாம் என்று முடிவெடுத்துள்ளோம். ஆகவே, அனைவரும் அப்புத்தகத்தை வாசிக்கும்படி கேட்டு கொள்ளபடுகின்றனர்.

 - மாற்றத்திற்க்கான செய்தியாளர்கள்.

தெலங்கானா: மக்கள், மண், போராட்டம்!

Share

 தெலங்கானா, கடலோர ஆந்திரா மற்றும் 

ராயல் சீமாவை குறிக்கும் வரைபடம்

தெலங்கானா என்று தற்போது அழைக்கப்படும் பகுதி 1742 முதல் 1948  வரை, ஹைதராபாத் நிஜாமால் ஆளப்பட்ட பகுதியாகும். தற்போதைய கர்நாடகா மற்றும் மகாராஷ்டிரா மாநிலங்களின் சில மாவட்டங்களையும், தற்போதைய தெலங்கானா பகுதிகளையும் உள்ளடக்கிய  இந்த நிலப்பரப்பு, ஹைதராபாத் சமஸ்தானம் என்று அழைக்கப்பட்டது. தற்போதைய, கடலோர ஆந்திரா மற்றும் ராயல் சீமா பகுதிகள்(தெலங்கான தவிர்த்த மற்ற பகுதிகள்)அன்றைய சென்னை மாகாணத்தின் (தமிழ் நாட்டின்) ஒருபகுதியாக இருந்தன. தெலங்கானா பகுதி 1952 வரை தனி ஒரு நிலப்பரப்பாகவே இருந்து வந்துள்ளது. அந்த நிலப்பரப்பை, மொகலாயர் காலத்துக்கு பின், ஹைதராபாத் நிஜாம் பரம்பரையினர் ஆண்டுவந்துள்ளனர். பிரிட்டிஷ் கிழக்கிந்திய கம்பெனியின் ஆதிக்கத்திற்கு அடிபணிந்த சிற்றரசுகளில், ஹைதராபாத் நிஜாமும் அடங்குவான். வெல்லஸ்லியின் திட்டப்படி, இவ்வாறு பிரிட்டிஷ் ஆதிக்கத்திற்க்கு அடிபணிந்த அரசுகளிடமிருந்து, கப்பம்(வரி) மட்டும் வாங்கிக்கொண்ட கிழக்கிந்திய கம்பனியினர், அந்த சிற்றரசுகளை, பிரிட்டிஷ் இந்தியாவுடன் இணைக்க வில்லை. ஆனால், அந்த சிற்றரசுகளின் பாதுகாப்பு மற்றும் வெளிஉறவு கொள்கைகளை பிரிட்டிஷாரே நிர்ணயம் செய்தனர். அதன் அடிப்படையில், தற்போதைய தெலங்கான பகுதி, பிரிட்டிஷ் ஆட்சி காலத்தில், இந்தியாவுடன் கூட, இணைந்து இருந்தது கிடையாது.

நிஜாம் மிர் ஒஸ்மான் அலி 

தெலங்கானா சிற்றரசில், அதாவது ஹைதராபாத் சமஸ்தானத்தில் 85 சதவீதத்திற்க்கும் அதிகமான மக்கள், தெலுங்கு மொழி பேசிவந்தனர். மிக குறைவானவர்களே "உருது" மொழி பேசிவந்தனர். ஆனால், நிஜாமின் ஆட்சியில், உருது மொழியே அரசு மொழியாக இருந்தது. பள்ளிகளிலும் உருது மொழியிலேயே பாடம் சொல்லிகொடுக்க பட்டன. ஆங்கிலம் கூட கற்பிக்க படவில்லை. இதனால், உருது பேச தெரியாத தெலங்கானா மக்களுக்கு அரசு வேலைவாய்ப்பு மறுக்க பட்டது. சிறுபான்மையினரான, உருது பேச தெரிந்த முஸ்லிம்களுக்கே அரசுவேலையில் முன்னுரிமை வழங்கப்பட்டது. அந்த காலத்திலேயே, ஹைதராபாத் நிஜாம் உலக பணக்காரர் பட்டியலில், முன்வரிசையில் இடம்பெற்றிருந்தான். அனைத்து வகையான ஆடம்பரங்களிலும் திளைத்துபோய் இருந்த நிஜாம், தன் ஆடம்பர வாழ்க்கைக்கு மக்களை கசக்கி பிழிந்தான். இதில் அதிக அளவில் பாதிக்கப்பட்டவர்கள், விவசாயிகளான தெலுங்கு பேசும் மக்களே. நிஜாமால் நியமிக்கப்பட்ட, ஜமீன்தார்களும், ஜாஹிர்தார்களும் விவசாய மக்களிடம் வரிவசூலிக்கும் அதிகாரத்தை பெற்றிருந்தனர். குட்டி ராஜாக்களை போன்று செயல்பட்ட இவர்கள், மக்களிடம் கடுமையாக வரி வசூலித்தனர். வரிகட்ட முடியாத விவசாயிகள் கடுமையாக தண்டிக்க பட்டனர். நிஜாமும், ஜமீன்தார்களும் சுகபோகமாக வாழ்வதற்க்காக, ஏழை விவசாயிகள் பட்டினியுடன் நிலத்தில் உழைத்தனர். விவசாயிகளின் ரத்தத்தி உறிஞ்சி பிழைத்த நிஜாம், உலக பணக்காரர் பட்டியலில் முதல் இடம் பிடித்தான்.

இதே வேளையில், அன்றைய சென்னை மாகாணத்தில்(தமிழ் நாட்டில்) இணைந்திருந்த, கடலோர ஆந்திரா மற்றும் ராயல் சீமா பகுதியை சேர்ந்த தெலுங்கு பேசும் மக்கள், பிரிட்டிஷார் கொண்டு வந்த கல்வி, விவசாயம் மற்றும் பல சீர்திருத்தங்களால், தெலுங்கானா(ஹைதராபாத் சமஸ்தானம்) மக்களை விட கல்வி அறிவு மற்றும் சமூக வாழ்வியலில் ஓரளவிற்கு முன்னேறி இருந்தனர். பிரிட்டிஷார் கொண்டுவந்த இந்த சீர்திருத்தங்கள், தங்கள் சுயநலத்துக்குதான் என்றாலும், அது சாதியில் சில தளர்வை ஏற்படுத்தியதுடன் கல்வியில் ஒடுக்க பட்ட மக்களுக்கு சில உரிமைகளை வழங்கியது. பிரிட்டிஷ் ஆட்சிபரப்பில், கல்விகூடங்களில் ஆங்கிலம் பயிற்றுவிக்கப்பட்டது.  பிரிட்டிஷார் ஜமிந்தாரி முறையை ஒழித்தனர். இதனால் தெலங்கானா பகுதி விவசாயிகள் அளவிற்க்கு பிரிட்டிஷ் ஆட்சியின் கீழ் இருந்த விவசாயிகள் துன்பம் அனுபவிக்க வில்லை(இதை சரியாக புரிந்து கொள்ளவேண்டும்). ஆகவே, கடலோர ஆந்திரா மற்றும் ராயல் சீமா மக்களுக்கு மட்டும் ஆங்கிலம் பயில வாய்ப்பு இருந்தது. இப்பகுதியில் தாழ்த்தப்பட்ட மக்கள் கல்வி கற்க தொடங்கினர். தெலங்கானா பகுதியை விட, இப்பகுதியில் விவசாயிகள் ஓரளவிற்க்கு முன்னேறி இருந்தனர். இவர்களுக்கும், தெலங்கானா பகுதி மக்களுக்கும் இருந்த ஒரே ஒற்றுமை, இருவரும் தெலுங்கு பேசினர். அதைத்தாண்டி, சமூக, பொருளாதார மற்றும் பண்பாட்டில் தெலங்கானா மக்கள் இவர்களிடமிருந்து வேறுபட்டனர்.

மக்கள் விடுதலை படை, அப்போது.

1946 ஆம் ஆண்டு, ஹைதராபாத் சமஸ்தானத்தில், இந்திய கம்யூனிஸ்ட் கட்சி(அப்போது கம்யூனிஸ்ட் கட்சி ஒன்று மட்டுமே இருந்தது), ஒடுக்கப்பட்ட விவசாயிகளை ஒன்று திரட்டி நிஜாமுக்கு எதிராக ஆயுத போராட்டத்தை துவங்கியது. இந்தியாவிலேயே, இப்போரட்டம்தான், முதல்முறையாக மக்களை திரட்டி, ஓர் அரசியல் கோரிக்கைக்காக நடத்தப்பட்ட, ஒழுங்கமைக்கபட்ட போராட்டமாகும். நிஜாமின் பேய் ஆட்சியை முடிவுக்கு கொண்டு வர நடத்தப்பட்ட இந்த போராட்டத்தில் தெலங்கானா விவசாயிகள் முன்னணி படையினராய் விளங்கினர். மக்கள் போராட்டத்தை கண்டு அஞ்சிய நிஜாம், மிர்வாஸ் என்ற தன் கொடுங்கோல் படையினை கொண்டு கடுமையாக தாக்கினான். இந்திய கம்யூனிஸ்ட் கட்சியின் கீழ் அரசியல் பூர்வமாக ஒருங்கிணைந்த மக்கள், நிஜாமின் கூலிப்படையை வீரத்துடன் எதிர்த்து நின்றனர். மக்களின் ரத்தத்தை உறிஞ்சி பிழைத்த ஜமிந்தார்களும், ஜாஹிர்தார்களும் மக்கள் விடுதலை படையினரால் கொல்லப்பட்டனர். அவர்களிடமிருந்து கைப்பற்றபட்ட நிலங்கள் விவசாயிகளுக்கு பிரித்து கொடுக்கபட்டது. போராட்டம் தொடங்கிய முதல் வருடங்களிலேயே, 3000 கிராமங்களுக்கு மேல் நிஜாமின் ஆதிக்கத்தில் இருந்து விடுதலை அடைந்தது. அவ்வாறு உருவான கிராமங்களில், சோவியத் யூனியனை போல், கம்யூன்கள் அமைக்கபட்டு மக்கள் தங்களை தாங்களே ஆட்சி செய்துகொண்டனர்.

மக்கள் விடுதலை படை, தற்போது.

1947 பிரிட்டிஷார் இந்தியாவை விட்டு வெளியேறினர். அச்சமயம், இந்தியாவில், ஹைதராபாத் சமஸ்தானத்தை போல் கிட்டத்தட்ட 500 க்கும் மேற்பட்ட சுதந்திர சமஸ்தானங்கள் இருந்தன. இந்த சமஸ்தானங்கள் தங்கள்  விருப்பத்தின் அடிப்படையில் இந்தியாவுடனோ அல்லது பாகிஸ்தான் உடனோ இணைந்து கொள்ளலாம் என்றும் அல்லது தனி நாடாக இருக்கலாம் என்றும் பிரிட்டிஷார் கூறினர். ஹைதராபாத் சமஸ்தானத்தை இந்தியாவுடன் இணைக்க நேரு விரும்பினார்(வழக்கம்போல்). இது குறித்து நிஜாமுக்கு தெரிவிக்க பட்டது. ஏற்கனவே, உள்நாட்டில் மக்கள் போராட்டம் உச்சத்தில் இருந்த நிலையில், தன்னை பாதுகாத்து கொள்வதற்க்காக, ஹைதராபாத் சமஸ்தானத்தை பாகிஸ்தான் உடன் இணைக்க, நிஜாம் விரும்பினான். சமஸ்தானத்தை இந்தியாவுடன் இணைப்பதா? பாகிஸ்தானுடன் இணைப்பதா? அல்லது தனிநாடாக இருப்பதா என்பது குறித்து தெலங்கானா(ஹைதராபாத் சமஸ்தானம்) மக்களிடம் நேருவும் கேட்கவில்லை, நிஜாமும் கேட்கவில்லை. நிஜாம் சமஸ்தானத்தை இந்தியாவுடன் இணைக்க விரும்பாததால், நேருவின் கட்டளைக்கு இணங்க, சர்தார் வல்லபாய் பட்டேல், இந்திய ராணுவத்தை தெலங்கானா மக்கள் மீது ஏவிவிட்டார்.

இந்திய ஆக்கிரமிப்பு ராணுவம்.

1948 ஆம் வருடம், செப்டம்பர் 13 ஆம் தேதி, இந்தியாவின் ஆக்கிரமிப்பு ராணுவம் தெலங்கானா(ஹைதராபாத் சமஸ்தானம்) பகுதிக்குள் நுழைந்தது. இதற்க்கு நேரு "ஆபரேஷன் போலோ" என்று பெயரிட்டார். பிறகு ராணுவம் என்ன செய்திருக்கும் என்பது சொல்லாமல் விளங்கக்கூடியதே. நிஜாமின் பேய் ஆட்சிக்கு எதிராக போராடி பெற்ற சுதந்திரத்தை, தெலங்கானா மக்கள் இந்திய ராணுவத்திற்கு இரையாக்க விரும்பவில்லை. ராணுவத்தின் கடும் அடக்குமுறைக்கு மத்தியில், போராடி பெற்ற விடுதலை பிரதேசங்களை, ஏறக்குறைய 3 ஆண்டுகள், மக்கள் தங்கள் கட்டுபாட்டில் வைத்திருந்தனர். மக்கள் விடுதலை படை, விடுதலை பிரதேசங்களை இந்திய ராணுவம் ஆக்கிரமித்து விடாமல், இரவு பகலாக காப்பாற்றியது. இச்சமயம், கடலோர ஆந்திரா மற்றும் ராயல் சீமா பகுதியை சேர்ந்த தெலுங்கு பேசும் மக்கள், தெலங்கானா பகுதிக்கு வரவைக்கபட்டு, இந்திய அரசால், அரசுவேலைகளில் அமர்த்தப்பட்டனர். தெலங்கானா பகுதியை இந்திய அரசு, ஹைதராபாத் மாநிலம் என்று அழைத்தது. இறுதியில், இந்திய கம்யூனிஸ்ட் கட்சி எடுத்த தவறான நிலைப்பாட்டால் மக்களின் வீரம் செறிந்த போராட்டம், ராணுவத்திற்கு காவு கொடுக்க பட்டது. இந்திய கம்யூனிஸ்ட் கட்சி அப்போது எடுத்த தவறான முடிவு இன்று வரை விமர்சிக்கபட்டு வருகின்றது.

பொட்டி ஸ்ரீராமுலு,

இறந்தபின் இந்திய அரசின் அஞ்ச(ல்)லி.

இதனிடையே, சென்னை மாகாணத்தை(தமிழ்நாட்டை) பிரித்து, ஆந்திரா தனிமாநிலம் அமைக்கவேண்டும் என்ற கோரிக்கை தெலுங்கு பேசும் மக்களிடம் வலுப்பெற்றுவந்தது. தெலுங்கு பேசும் மக்களின் உரிமைகளை பாதுகாக்கும் வகையில், ஆந்திரா என்ற தனிமாநிலத்தை உருவாக்கி அதற்க்கு சென்னையை(சென்னை நகரை) தலைநகராக அறிவிக்கவேண்டும் என்ற கோரிக்கையை வலியுருத்தி பொட்டி ஸ்ரீராமுலு என்பவர் அக்டோபர் 19 ஆம் தேதி 1952 ஆம் வருடம், சாகும் வரை உண்ணாவிரதத்தை தொடங்கினார். இதுகுறித்து சிறிதும் கவலைப்படாத நேரு, அவரின் உண்ணாவிரதத்தை முடித்துவைக்க எந்தவித முயற்சியும் எடுக்கவில்லை. 63 நாட்கள் உண்ணாவிரதம் இருந்த பொட்டி ஸ்ரீராமுலு 1952  டிசம்பர் 15 ஆம் நாள் நள்ளிரவு, உயிரிழந்தார். இது தெலுங்கு பேசும் மக்களிடம் பெரும் அதிர்ச்சியை ஏற்படுத்தியது. பொட்டி ஸ்ரீராமுலு வின் இறுதி ஊர்வலம், சென்னை மவுண்ட் ரோடை கடக்கும்போது பெரும் கலவரம் வெடித்தது. தெலுங்கு பேசும் பகுதியில்(அதாவது, கடலோர ஆந்திரா மற்றும் ராயல் சீமா) தனி ஆந்திர மாநில கோரிக்கையை வலியுரித்தி மக்கள் போராட்டத்தில் குதித்தனர். சுமார் 7 பேர் கொல்லப்பட்டதாக அரசு அறிவித்தது. தெலுங்கு பேசும் பகுதிகள் பற்றி எரிந்தன. இறுதியில் டிசம்பர் 19 ஆம் தேதி, ஆந்திரா தனிமாநில அறிவிப்பை நேரு வெளியிட்டார். இருந்தபோதும், சென்னை நகரம் ஆந்திராவுக்கு கொடுக்கபடவில்லை. 1953 ஆம் ஆண்டு, அக்டோபர் 1 ஆம் தேதி, குர்நூலை தலைநகராக கொண்ட தனி ஆந்திர மாநிலம் உருவாக்கப்பட்டது. அப்போதும்கூட, தெலங்கானா பகுதி புதிதாக உருவான ஆந்திர மாநிலத்துடன் இணைக்க படவில்லை. ஆந்திர மாநிலம் உருவானபின் அடுத்த மூன்று வருடம் தெலங்கானா தனி மாநிலமாகவே (ஹைதராபாத் என்ற பெயரில்) இருந்துவந்தது.

 ஆந்திர மாநிலம், தெலங்கானாவுடன்.

மொழிவாரி மாநிலங்களை உருவாக்க அமைக்கப்பட்ட கமிட்டியின் பரிந்துரையையும் மீறி,1956 நவம்பர் 1 ஆம் தேதி, தாய் தெலங்கானாவை ஆந்திராவுடன் இணைத்தது இந்திய அரசு. தெலங்கானா பகுதியில் இருந்த ஹைதராபாத் ஆந்திராவின் புதிய தலைநகராக அறிவிக்க பட்டது. கொடுங்கோலன் நிஜாமின் ஆட்சியின் கீழ் வாழ்ந்த படிப்பறிவு குறைவான, சமூக அளவுகோளில் மிகவும் பின்தங்கிய தெலங்கானா மக்கள், பிரிட்டிஷ் ஆட்சியின் கீழ் ஓரளவிற்க்கு படித்த, சமூக அளவில் உயர்ந்த மக்களுடன் இணைக்கப்பட்டனர். இதற்க்கும் மேல் சொல்லி விளங்கவைக்க தேவை இல்லை. பிரிட்டிஷ் ஆட்சியின் கீழ் வாழ்ந்த உயர் சாதி ஆந்திரமக்கள், அதாவது, கடலோர ஆந்திரா மற்றும் ராயல் சீமாவை சேர்ந்த தெலுங்கு பேசும் மக்கள், அனைத்து துறைகளிலும் முன்னேறினர். பெரும்பாலும் தலித் சமூகத்தை சேர்ந்த விவசாயிகளான தெலங்கானா மக்கள் தொடர்ந்து பின்தங்கியே இருந்து வருகின்றனர். அரசு வேலைவாய்ப்பிலும்  படித்தவர்கள் எண்ணிக்கையிலும், தெலங்கானா மக்கள் பெரும் அளவிற்க்கு முன்னேற்றம் பெறாமலே உள்ளனர். வளம் மிக்க தாய் தெலங்கானா பகுதியை, தெலங்கானா அல்லாத பகுதியை சேர்ந்த உயர்சாதியினர் மற்றும் அரசியல்வாதிகள் அனுபவிப்பதுடன், பன்னாட்டு முதலாளிகளுக்கும் தாரைவார்த்து வருகின்றனர். இதனாலேயே, தெலங்கானா மக்கள் தாங்கள் முன்னர் இருந்தது போலவே தனிமாநிலமாக இருக்க விரும்புகின்றனர். தெலங்கான தனி மாநிலம் கேட்டு போராட்டம் நடத்தி வருகின்றனர்.

மரம் ஓய்வை விரும்பினாலும், காற்று விடுவதில்லை!

தெலங்கானா மக்கள் எதை இழந்தாலும், தங்கள் போராட்ட குணத்தை இன்னும் இழக்கவில்லை. நிஜாமின் ஆதிக்கத்தையும், இந்திய ராணுவத்தின் அடக்குமுறையையும் எதிர்த்து ஆயுத போராட்டத்தை நடத்திய ஒரு தலைமுறை, தங்கள் பிள்ளைகளுக்கு போரட்டகுணத்தை ஊட்டி சென்றுள்ளது. போராடி பெற்ற விடுதலை பிரதேசத்தில் வாழ்ந்து பழகிய தாய்மார்கள், தங்கள் பிள்ளைகளுக்கு சுதந்திரத்தின் சுவையை பாலை ஊட்டியுள்ளனர். அதனால்தான் சுதந்திர கனல் பற்றி எரிகிறது தெலங்கானாவில்.

ஜெய் தெலங்கானா!

தேசிய இனங்களின் சுயநிர்ணய உரிமையை மறுக்கும் இந்திய அரசின் கொள்கையை எதிர்ப்போம்!
சுயநிர்ணய உரிமைக்கான தெலங்கானா மக்களின் போராட்டதிற்க்கு தோள்கொடுப்போம்!
சுயநிர்ணய உரிமைக்கான போராட்டத்தை கட்டியமைப்போம்!

அசீப்.

ஆவணப்படம்: "ஸ்ரீலங்கா கொலைக்களம்"!

Share

பிரிட்டனின், சேனல் 4 தொலைக்காட்சி ஒளிபரப்பிய, இலங்கை அரசு தமிழர்களுக்கு எதிராக நிகழ்த்திய இனப்படுகொலைக்கு ஆதாரமான, "ஸ்ரீலங்கா கொலைகளம்" ஆவணப்படம் கீழ்காணும் தேதிகளில் "Headlines Today" மற்றும் "Aaj Tak " தொலைக்கட்சிகளில் ஒளிபரப்பப்பட உள்ளது. 

• 07/07/2011 - 10.00 (இரவு)
• 08/07/2011 - 11.00 (இரவு)
• 09/07/2011 - 10.00 (இரவு)

தேசிய இனங்களின் சுயநிர்ணய உரிமையை மறுக்கும், இந்திய அரசின் ஏகாதிபத்திய ஆதரவு கொள்கையை எதிர்ப்போம்!

தமிழகத்தில் சுயநிர்ணய உரிமைக்கான போராட்டத்தை கட்டி அமைப்பதன் மூலம், ஈழ போராட்டத்திற்க்கு தோள்கொடுப்போம்!

ஈழ படுகொலைக்கு நீதி, சுதந்திர தமிழ் ஈழம்!

போராட்டமே அதை அடையும் வழி! 

சமச்சீர் கல்வி: நீதி கிடைக்குமா?

Share

உச்சநீதி மன்றத்தின் உத்தரவுபடி, தமிழக அரசால் அமைக்கப்பட்ட நிபுணர் குழு(??), சமச்சீர் கல்வி புத்தகங்கள் குறித்த தங்கள் ஆய்வு அறிக்கையை இன்று சென்னை உயர்நீதி மன்றத்தில் தாக்கல் செய்துள்ளது. அவர்கள் சமச்சீர் புத்தகங்கள் குறித்து கூறியுள்ள சில கருத்துக்கள் இவை. 

• புத்தகங்கள் அவசரகதியில் தயாரிக்க பட்டுள்ளன.
• மாணவர்களின் சிந்தனை திறனை வளர்க்கும் விதத்தில் புத்தகங்கள் இல்லை.
• சமச்சீர் புத்தகம் உலக தரத்தில் இல்லை. 

இந்திய கல்வி முறை, கிட்டத்தட்ட இருநூறு ஆண்டு பழமையானது. இன்னும் எத்தனை நிபுணர் குழுக்களை அமைத்தாலும், அவர்கள் தயாரிக்கும் புத்தகங்கள் வேண்டுமென்றால் சிறந்ததாக இருக்கலாம். ஆனால், கல்வி கற்பிக்கும் முறையில் மாற்றம் கொண்டு வரப்படாமல், மாணவர்களின் சிந்தனை திறனை மாற்றி அமைக்க முடியமா?

• "பாடத்திட்ட வடிவமைப்புக்கான தேசிய கவுன்சில்" கூறியுள்ள வழிகாட்டுதல்கள், சமச்சீர் புத்தகம் தயாரிக்கப்பட்ட போது, முறையாக கடைபிடிக்க படவில்லை.

அப்படி என்றால், பாட புத்தகத்தில், வந்தே மாதரம் பாடல் இடம் பெறவில்லையோ? பகத் சிங்கை தீவிரவாதி என்று கூறாமல், மறந்து போய், விடுதலை போராட்ட வீரன் என்று கூறி விட்டார்களோ? தமிழக வரைபடத்தில் மறதியாக, கச்சதீவை சேர்த்து விட்டார்களோ? தமிழக மாணவர்களுக்கான பாடத்திட்டம் எப்படி அமைக்கப்படவேண்டும் என்பதை, தேசிய கவுன்சில்-இல் உள்ளவர்கள் நிர்ணயிக்க வேண்டுமாம்!!!

     இன்னும் இதுபோல் பல்வேறு விஷயங்களை கண்டுபிடித்து கூறியுள்ளது நமது நிபுணர் குழு(????)

     சமச்சீர் கல்வி குறித்த வழக்கை வரும் வியாழன் முதல் தினமும் விசாரிக்க போவதாக அறிவித்துள்ளது சென்னை உயர்நீதி மன்றம். வரும் திங்கள் அல்லது செவ்வாய்கிழமை அன்று தமிழக மாணவர்களுக்கு நீதி(??) கிடைக்கும் என்று எதிர் பார்க்க படுகிறது. 

அசீப்

சரிகிறது சாம்ராஜ்யம்: சக்சேனா கைது!

Share

'தீராத விளையாட்டு பிள்ளை ' படத்தின் தயாரிப்பாளரிடம் 90 லட்சம் ருபாய் ஏமாற்றியதாக அவர்மீது கமிஷனர்ரிடம் புகார்  அளிக்கப்பட்டதன் பெயரில், அசோக்நகர் காவல்துறை, சக்சேனாவை ஏர்போர்ட்ல் சுற்றிவளைத்து கைது செய்துள்ளது.நேற்றே சைதாபேட்டை நீதிபதிகள் குடியிருப்பில் ஆஜர்படுத்தப்பட்டு, 14 நாள் நீதிமன்ற காவலில் புழல் சிறையில் அடைக்கப்பட்டுள்ளார் சக்சேனா. 
இதே சக்சேனா மீது, 
- செக்கர்ஸ் ஹோட்டல் அடித்து உடைத்த வழக்கு, 
- காவலன் பட தயாரிப்பாளரிடம் பணம் ஏமாற்றிய வழக்கு, 
- மக்சிஸ் நிறுவனம் சன் DTH-இல் முதலீடு செய்த 2G ஸ்பெக்ட்ரம் வழக்கு, 
என பல வழக்குகள் பாய தயாராக உள்ளன! அவை அனைத்திற்கும் அச்சாரமாகவே நேற்று சக்சேனா கைது செய்யப்பட்டுள்ளார்.முதல் 2 வழக்குகளை தமிழ்நாடு போலீஸ் விசாரிக்கக இருக்கும் நிலையில், மூன்றாவது வழக்கை CBI விசாரிக்க உள்ளது குறிப்பிடத்தக்கது!CBI விசாரிக்க துவங்கினால் தயாநிதி மாறன் மற்றும் கலாநிதி மாறன் ஆகியோரும் சிக்கக்கூடும் என கூறப்படுகிறது!