சரிகிறது சாம்ராஜ்யம்: சக்சேனா கைது!

Share

'தீராத விளையாட்டு பிள்ளை ' படத்தின் தயாரிப்பாளரிடம் 90 லட்சம் ருபாய் ஏமாற்றியதாக அவர்மீது கமிஷனர்ரிடம் புகார்  அளிக்கப்பட்டதன் பெயரில், அசோக்நகர் காவல்துறை, சக்சேனாவை ஏர்போர்ட்ல் சுற்றிவளைத்து கைது செய்துள்ளது.நேற்றே சைதாபேட்டை நீதிபதிகள் குடியிருப்பில் ஆஜர்படுத்தப்பட்டு, 14 நாள் நீதிமன்ற காவலில் புழல் சிறையில் அடைக்கப்பட்டுள்ளார் சக்சேனா. 
இதே சக்சேனா மீது, 
- செக்கர்ஸ் ஹோட்டல் அடித்து உடைத்த வழக்கு, 
- காவலன் பட தயாரிப்பாளரிடம் பணம் ஏமாற்றிய வழக்கு, 
- மக்சிஸ் நிறுவனம் சன் DTH-இல் முதலீடு செய்த 2G ஸ்பெக்ட்ரம் வழக்கு, 
என பல வழக்குகள் பாய தயாராக உள்ளன! அவை அனைத்திற்கும் அச்சாரமாகவே நேற்று சக்சேனா கைது செய்யப்பட்டுள்ளார்.முதல் 2 வழக்குகளை தமிழ்நாடு போலீஸ் விசாரிக்கக இருக்கும் நிலையில், மூன்றாவது வழக்கை CBI விசாரிக்க உள்ளது குறிப்பிடத்தக்கது!CBI விசாரிக்க துவங்கினால் தயாநிதி மாறன் மற்றும் கலாநிதி மாறன் ஆகியோரும் சிக்கக்கூடும் என கூறப்படுகிறது! 

அண்ணன் பராக்! பராக்! பராக்!

Share

              கொடும் செயலுக்கு எதிரான நாள் என்று ஐ.நா அவையால் அறிவிக்கப்பட்டுள்ள ஜூன் இருபத்து ஆறாம் நாள், ஞயிற்றுக்கிழமை மாலை, சென்னை மெரினா கடற்க்கரையில், சிங்கள இனவெறி அரசால், இனப்படுகொலைக்கு ஆளாக்கப்பட்ட ஈழ தமிழர்களுக்கு அஞ்சலி செலுத்தும் நிகழ்வுக்கு "மே - பதினேழு" இயக்கம் ஏற்பாடு செய்திருந்தது. (பல்வேறு அமைப்பினரும் கலந்து கொண்டிருந்தாலும், இந்த நிகழ்வை நடத்தியவர்கள் மே -பதினேழு இயக்கத்தினரே). மே -பதினேழு இயக்கத்தின் தலைவர் திருமுருகனிடம், நிகழ்வுக்கு சிலநாட்கள் முன் நாங்கள் பேசியபோது, நிகழ்வில் ஒரு லட்சம் பேர் கூடுவார்கள் என்று அவர் கூறினார். அப்போது அதை மிகைப்படுத்தல் என்று நாங்கள் நினைத்தாலும், நிகழ்வுக்கு வந்த கூட்டத்தை பார்த்தபின், அதுவொன்றும் அவ்வளவு மிகைப்படுத்தல் அல்ல என்று நாங்கள் விளங்கிக்கொண்டோம்.

நிகழ்வு மாலை ஐந்து மணிக்கு தொடங்கும் என்று அறிவிக்கபட்டிருந்தாலும், மதியம் இரண்டு மணி முதலே மக்கள் கூட தொடங்கி விட்டனர். நேரம் நெருங்க நெருங்க மக்கள் கூட்டம் அதிகரிக்க தொடங்கவே, தோழர்கள், மக்களை ஒழுங்கு படுத்தி ஓர் இடத்தில் உட்கார வைப்பதற்குள் பெரும் பாடு பட்டுவிட்டனர். உணர்வு வயப்பட்ட கூட்டத்தினர், தங்கள் கோரிக்கைகளை முழக்கங்களாக எழுப்பத்தொடங்கினர். கடற்கரைக்கு காற்றுவாங்க வந்த மக்களில் பலரும் கூட்டத்தோடு கூட்டமாக கலந்து விட்டனர். 

நேரம் செல்ல செல்ல, தலைவர்கள்(??) ஒவ்வொருவராக வர ஆரம்பித்தனர். அரைவட்டமாக அமர்ந்திருந்த மக்கள் கூட்டத்தின் ஒரு மூலையில், முக்கியமான நிகழ்வுகள் நடைபெற ஏற்பாடு செய்யப்பட்டிருந்தது. அங்குதான் தலைவர்களும்(??) அமர்ந்திருந்தனர். அப்போதுதான் நாம் தமிழர் கட்சியின் தலைவர் சீமானும் வந்தார். நிகழ்விற்கு, பெரும் கூட்டத்தோடு(????) வந்த சீமான், நேராக தலைவர்கள்(??) அமர்ந்திருக்கும் இடத்திற்கு செல்லாமல், தான் வந்திருப்பதை எல்லோருக்கும் தெரிவிக்கவோ, என்னவோ, அமர்ந்திருந்த மக்கள் கூடத்தின் ஒருமுனையில் இருந்து ஊர்வலமாக நடக்க தொடங்கினார். 

சீமானுடன் வந்திருந்தவர்கள்(????), அண்ணனை பாதுகாக்கிறோம் என்ற பெயரில், கொஞ்சமும் கூச்சப்படாமல், அமர்ந்திருந்த மக்கள் மீது ஏறி நடக்க ஆரம்பித்தனர். மிதிபட்ட மக்கள், அவர்களை திட்டக்கூட முடியாமல் அமர்ந்திருக்க, அந்த கூட்டம் வழக்கறிஞர்கள் அமர்ந்திருந்த இடத்தை அடைந்தது. "ஹே! அண்ணனை தொடாதே!, ஹே! அண்ணனுக்கு வழிவிடு!" என்று கூட்டத்தினரை மிரட்டிக்கொண்டும், மிதித்துக்கொண்டும் வந்தவர்கள், பெண் வழக்கறிஞர் ஒருவரின் காலை மிதித்து விட்டனர். இதை எதிர்த்து கேள்வி கேட்ட அந்த பெண்ணை, "உனக்கு பாதுகாப்பா இருக்கணும் என்று நினைத்தால் ஏன் இங்கு வந்தாய்? பெண்ணாய் அடக்கமாய் வீட்டில் இருந்திருக்க வேண்டியதுதானே" என்று ஏளனமாய் பேசி உள்ளனர் சீமானின் சிஷ்யன்கள்(????). வெகுண்டெழுந்த நம் பெண் வழக்கறிஞர், "பெண் விடுதலையை வாய்கிழிய பேசும் உங்கள் அமைப்பில் பெண்களை இப்படிதான் நடத்துவீர்களா? நீங்கள் எல்லாம் தோழர்களா? நீங்கள் அணிந்திருக்கும் பெரியார் டி-ஷர்ட்டை அவிழ்த்து எறியுன்கடா" என்று திட்டி தீர்த்துள்ளார். 

இதன்பிறகும் கொஞ்சமும் கலக்கமடையாத அந்த கூட்டம், தலைவர்கள்(??) இருந்த பகுதிக்குள் அதே வேகத்துடன் நுழைந்தது. முன்னே நின்றவர்களை தள்ளிக்கொண்டு உள்ளே நுழைந்தவர்கள், பின்னே இருந்தவர்களை தள்ளிவிட, அவர்களில் ஒருவர், தலைவர்(??) ஒருவரின் மீது போய் விழுந்தார். இதைக்கண்டு வெகுண்டெழுந்த மற்றொரு தலைவர்(??), சீமானை பார்த்து "சீமான், உன் ஆட்களை ஒழுங்கு படுத்து" என்று கோபமாக கூறினார். அதை பெரிதும் பொருட்படுத்தாத சீமான், பெயருக்காக தன் கூட்டத்தை(????) ஒருமுறை திரும்பி பார்த்து பின்னர் அமர்ந்து கொண்டார். 

"ஹே! அண்ணனை தொடாதே!, ஹே! அண்ணனுக்கு வழிவிடு!" என்ற சப்தம் சீமான், நிகழ்விலிருந்து கிளம்பும் வரை கேட்டுக்கொண்டே இருந்தது. அதன் பிறகு, யார் எல்லாம் மிதிபட்டார்கள் என்பதை கவனிக்கும் முன், இருள் சூழ தொடங்கி விட்டது. மெழுகுவர்த்தியை ஏந்திய மக்கள், நிகழ்வின் இறுதியில் நிகழ்த்தப்பட்ட நாடகத்தை கண்டு கழித்துவிட்டு நகர தொடங்கினர். 

விழா அமைப்பு தோழர்கள், மக்கள் விட்டெறிந்து சென்ற குப்பைகளை மிகவும் பொறுப்புடன் அப்புற படுத்திக்கொண்டு இருந்தனர்.

_________

???? = அள்ளக்கை. 

?? = எனப்படுபவர்கள்.

__________

அசீப்.

2 ஜி ஸ்பெக்ட்ரம் ஊழல்:

Share

2 ஜி ஸ்பெக்ட்ரம் ஊழல்:

• ஸ்பெக்ட்ரம் (அலைக்கற்றை) என்றால் என்ன?

ஸ்பெக்ட்ரம் என்றால் வேவ்ஸ் என்று சொல்லப்படும் மின் காந்த அலைகள். ஒரு இடத்திலிருந்து இன்னொரு இடத்திலிருக்கும் ஒருவருக்கு தொடர்பு கொண்டு பேச உதவும் கம்பியில்லா அலைகள்.ரேடியோ, டிவி, செயற்கைக்கோள் என ஒவ்வொன்றுக்கும் ஒவ்வொரு வகையான ஸ்பெக்ட்ரம் பிரீகுவென்சி ஒதுக்கப்படும்.

• 2 ஜி ஸ்பெக்ட்ரம் என்றால் என்ன?

ஜி என்பது ஜெனரேஷன் - தலைமுறை என்பதைக் குறிக்கும். 1 ஜி என்பது முதல் தலைமுறை. லேண்ட்லைன் டெலிபோன், வாக்கி டாக்கி உள்ளிட்டவை முதல் தலைமுறை ஸ்பெக்ட்ரத்தில் அடங்கும். இரண்டாம் தலைமுறையின் கீழ் செல்போன் வரும். 3 ஜி - மூன்றாம் தலைமுறை செல்போனிலேயே முகம் பார்த்துப் பேசுவது.

• யார் ஸ்பெக்ட்ரத்தை ஒதுக்குவது?

இந்திய அரசாங்கம் ஸ்பெக்ட்ரத்தை நிறுவனங்களுக்கு ஒதுக்கீடு செய்யும். மத்திய தொலைத்தொடர்புத் துறை மூலமும், ட்ராய் என்றழைக்கப்படும் டெலிகாம் ரெகுலாரிட்டி ஆத்தாரிட்டி ஆப் இந்தியா (தொலைத்தொடர்பு ஒழுங்குமுறை ஆணையம்) மூலம் நிறுவனங்களுக்கு ஸ்பெக்ட்ரம் ஒதுக்கீடு செய்யும்.

• ஊழல் எவ்வாறு நடந்தது?

'முதலில் வருபவருக்கு முன்னுரிமை' என்ற விதியை ட்ராய் வகுத்தது. அதன் அர்த்தம் எந்த நிறுவனம் முதலில் ஸ்பெக்ட்ரம் ஒதுக்கீடுக்கு விண்ணப்பம் செய்கிறதோ அதிலிருந்தே கணக்கு எடுத்துக்கொள்ளப்படவேண்டும். ஆனால் முன்னாள் தொலைத்தொடர்பு அமைச்சரான ராசாவோ தனக்கு வேண்டப்பட்ட, கொல்லைப்புறமாக பணம் கொடுத்த நிறுவனங்களுக்கு முன்பே ரகசியமாக தெரிவித்துவிட்டு, வேண்டப்படாத நிறுவனங்களுக்கு சொல்லாமல் திடீரென்று ஒரு தேதியை குறிப்பிட்டு, அத்தேதியில் குறிப்பிட்ட 45 நிமிடத்திற்குள் கோடிக்கணக்கான பணத்தை வங்கிகளிலிருந்து டிடியாக எடுத்து வரவேண்டுமென்றும் உத்தரவிட்டார். முன்பே சொல்லாமலிருந்தால் எவ்வாறு 45 நிமிடத்திற்குள் கோடிக்கணக்கான ரூபாயை வங்கியிலிருந்து எடுக்கமுடியும்? அவ்வாறு பணம் கட்டிய ஸ்வான் டெலிகாம், யூனிடெக் உள்ளிட்ட சில நிறுவனங்களுக்கு ஸ்பெக்ட்ரம் ஒதுக்கப்பட்டன. இதில் ஸ்வான் டெலிகாம் ஸ்பெக்ட்ரத்தைப் பெற்று அதை துபாயைச் சேர்ந்த எடிசலாட் என்ற நிறுவனத்திற்கு விற்றது. அந்த எடிசலாட் நிறுவனம் பாகிஸ்தானின் உளவு அமைப்பான ஐ.எஸ்.ஐ.க்கு தொடர்புள்ள நிறுவனமென்றும், அதன் இயக்குனர் ஷாஹித் பால்வா, மும்பை நிழல் உலக தாதா தாவூத் இப்ராஹிமின் கூட்டாளி என்றும் கூறப்படுகிறது. யூனிடெக் என்பது ஒரு ரியல் எஸ்டேட் நிறுவனம் (தினத்தந்தி நாழிதளில் அடிக்கடி முதல் பக்கத்தில் விளம்பரம் வரும்). யூனிடெக் ஸ்பெக்ட்ரத்தை வாங்கி, பலமடங்கு லாபாம் பார்த்து நார்வேயைச்சேர்ந்த டெலினார் என்ற நிறுவனத்திற்கு விற்றது. (யூனிடெக் மற்றும் டெலினார் இரண்டு பெயரையும் சேர்த்து யூனினார் என்று நிறுவனத்தை துவக்கினார்கள்). மேலும் டாடா நிறுவனமும் ஸ்பெக்ட்ரத்தை வாங்கி ஜப்பான் நாட்டு நிறுவனமான டொகோமொவிடம் பன்மடங்கு லாபம் வைத்து விற்றுவிட்டது.

மேலும் முக்கியமானது விலை. 2001ல் சர்க்கரை விலை 12 ரூபாயாக இருந்திருக்கும். அதே 2008ல் 16 ரூபாயாக உயர்ந்திருக்கும். ஆனால் 2001 ஆம் ஆண்டின் விலையிலேயே 2008 ஆம் ஆண்டிலும் விற்றால் 4 ரூபாய் நஷ்டம் ஏற்படும். அதே கதைதான் ஸ்பெக்ட்ரம் ஊழலிலும் நடந்தது. 2001 ஆம் ஆண்டின் விலையிலேயே 2008 ஆம் ஆண்டும் ஸ்பெக்ட்ரத்தை ராசா விற்றார். இதனால் அரசுக்கு 1 லட்சத்து 76 ஆறாயிரம் கோடி ரூபாய் நஷ்டம் ஏற்பட்டதென்று இந்திய கணக்குத தணிக்கைக் குழு தெரிவித்துள்ளது. இவ்வாறு குறைந்த விலையில் ஸ்பெக்ட்ரம் விற்றதால் ராசா கொல்லைப்புறமாக 60 ஆயிரம் கோடி ரூபாய்க்கும் அதிகமாக பெற்று, அதை தன்னை வளர்த்த கட்சிக்கும், தனது தலைவருக்கும், நெருங்கியவர்களுக்கும் (கனிமொழி) பங்கிட்டு கொடுத்ததாக கூறப்படுகிறது.

ஐ.எஸ்.ஐ.யுடன் தொடர்புள்ள எடிசலாட் நிறுவனத்திற்கும், சீனா ராணுவத்துடன் தொடர்புள்ள டெலினார் நிறுவனத்திற்கும் ஸ்பெக்ட்ரம் ஒதுக்கக்கூடாது என நிதி அமைச்சகம் கூறியிருப்பதாகவும் கூறப்படுகிறது. ஆனால் அப்போது நிதி அமைச்சராகயிருந்த ப.சிதம்பரம் அவ்விதியைத் தளர்த்தி ஸ்வான் மற்றும் யூனிடெக் நிறுவங்கள் மூலம் ராசாவுடன் சேர்ந்துகொண்டு ஸ்பெக்ட்ரம் வழங்க உதவியதாகவும், ராசாவின் நடவடிக்கை அனைத்திற்கும் ப.சிதம்பரத்திற்கும் தொடர்பிருப்பதாகவும், அடுத்தடுத்த குற்றப்பதிரிகையில் தற்போது உள்துறை அமைச்சராக இருக்கும் ப.சிதம்பரம் பெயரும் இடம்பெறக்கூடும் எனவும் கூறப்படுகிறது.

ராசாவுக்கு முன்பு அப்பதவியிலிருந்த தயாநிதி மாறனிடம் ஏர்செல் நிறுவனத்தைத் துவங்கிய சிவசங்கரன் ஸ்பெக்ட்ரம் வேண்டி விண்ணப்பம் செய்தார். ஆனால் ஸ்பெக்ட்ரம் வழங்க மறுத்த மாறன், மலேசியாவைச் சேர்ந்த  இலங்கைத் தமிழர் அனந்தகிருஷ்ணன் என்பவருக்கு ஏர்செல் நிறுவனத்தை விற்கச்சொல்லி மிரட்டினார். மிரட்டல் தாங்க முடியாமல் சிவசங்கரனும் ஏர்செல்லை விற்றுவிட்டார். அடுத்த சில மாதங்களில் ஏர்செல்லுக்கு ஸ்பெக்ட்ரம் ஒதுக்கப்பட்டது. இது ஏனெனில், ஏர்செல்லை வாங்கியவர் நடத்திவரும் மேக்சிஸ் நிறுவனம், தயாநிதி மாறனின் சகோதரராகிய கலாநிதி மாறனுடைய சன் டி.டி.ஹெச்.ல் முதலீடு செய்துள்ளது. அதன் காரணமாகவே தயாநிதி மாறன் அவ்வாறு செய்தார் என கூறப்படுகிறது. அதன் மூலம் தயாநிதி மாறன் 625 கோடி ரூபாய் லஞ்சம் வாங்கியதாகவும், சி.பி.ஐ.யிடம் வாக்குமூலம் அளித்துள்ளார் சிவசங்கரன். ஜூன் 30 ஆம் தேதி தாக்கலாகவுள்ள 3 வது குற்றப்பத்திரிக்கையில் தயாநிதி மாறன் பெயர் இடம்பெறும் என்றும் கூறப்படுகிறது. 

• கனிமொழி சிக்கியது எப்படி?

தயாநிதி மாறனுடன் மோதல் ஏற்பட்டபோது, சன் டிவியிலிருந்து பங்குகளை திரும்பப்பெற்றுக்கொண்டு கலைஞர் டிவி துவக்கப்பட்டது. வெறும் 5 கோடி ரூபாய் அளவே முதலீடு கொண்ட கலைஞர் டிவிக்கு 214 கோடி ரூபாய் கடனாக டி.பி. ரியாலிட்டி நிறுவனம் கொடுத்துள்ளது. அத்தொகையையும் வட்டி 31 கோடி ரூபாயையும் சேர்த்து திரும்பக்கொடுத்து விட்டதாக கலைஞர் கூறுகிறார். கலைஞர் டிவி துவங்கி இரண்டு வருடமே ஆகிறது, பின் எவ்வாறு இவ்வளவு பெரிய தொகையை அவர்கள் திரும்பக்கொடுத்தார்கள்?

கலைஞர் டிவிக்கு கொடுக்கப்பட்ட பணமும் நேரடியாக கொடுக்கப்படவில்லை. தலையைச்சுற்றி மூக்கைத் தொடுவதுபோல், ஸ்வான் டெலிகாமின் துணை நிறுவனமான டி.பி. ரியாலிட்டிகுச்சென்று, அங்கிருந்து அதன் துணை நிறுவனமான குசெகான் ப்ரூட்ஸ் அண்ட் விஜிடேபில்ஸ்  நிருவனத்திற்குச்சென்று , அங்கிருத்து அதன் துணை நிறுவனமான சினியுக் நிருவனத்திற்குச்சென்று, அங்கிருந்து கலைஞர் டிவிக்கு வந்துள்ளது. டி.பி. ரியாலிட்டி, குசெகான் ப்ரூட்ஸ் அண்ட் விஜிடேபில்ஸ், சினியுக் என அட்ரஸ் இல்லாத நிறுவனங்களைச் சுற்றி வந்ததாலும், அந்த நிறுவனங்கள் அனைத்தும் ஸ்பெக்ட்ரம் ஊழலில் சிக்கியிருப்பதாலும், 214 கோடி ரூபாய் ஊழல் பணமே என்று சி.பி.ஐ. கூறுகிறது. ஒழுங்கான பணமாக இருந்திருந்தால் நேரடியாக கொடுக்கப்பட்டிருக்கும், கருப்புப்பனமாக இருப்பதாலேயே இவ்வளவு தூரம் சுற்றி வந்துள்ளது என்றும் சி.பி.ஐ. நினைக்கிறது. இதன் காரணமாகவே 20 சதவீத கலைஞர் டிவி பங்கு வைத்திருக்கும் கனிமொழியும், அதே 20 சதவீத பங்கு வைத்திருக்கும் கலைஞர் டிவி நிர்வாக இயக்குனர் சரத் குமாரும் சி.பி.ஐ.யால் கைது செய்யப்பட்டு திகார் சிறையில் அடைக்கப்பட்டு உள்ளனர். வயதானவர் என்பதால் 60 சதவீதம் பங்கு வைத்திருக்கும் கலைஞரின் இரண்டாவது மனைவியான தயாளு அம்மாள் பெயரைச் சேர்க்கவில்லை என சி.பி.ஐ. கூறியது. சி.பி.ஐ. சிறப்பு நீதிமன்றம், டெல்லி உயர் நீதிமன்றம், உச்ச நீதிமன்றம் என மூன்றும் கனிமொழி, சரத் குமாரின் ஜாமீன் மனுக்களை நிராகரித்தது குறிப்பிடத்தக்கது.

• இனி என்ன நடக்கும்?

கழகத்திற்காக உழைத்த தன்னைக் காட்டிக்கொடுத்ததால் ராசாவும், 214 கோடி ரூபாய் பணப்பரிவர்த்தனை நடந்தபோது கலைஞர் டிவி நிர்வாக இயக்குனர் பதவியில் இல்லாமலேயே மாட்டிய  சரத் குமாரும் அப்ரூவர் ஆக வாய்ப்புள்ளது!. அதிகபட்சமாக 11 குற்றப்பத்திரிகை தாக்கலாகவுள்ளதாக கூறப்படுகிறது. அதுவரையில் கனிமொழி, ராசா, சரத் குமார் ஆகியோர் ஜெயிலேயே இருக்க நேரிடும். தயாநிதி மாறன், ப.சிதம்பரம் ஆகியோரையடுத்து மேலும் சில தி.மு.க., காங்கிரஸ் தலைகளின் பெயர்கள் குற்றப்பத்திரிகையில் இடம்பெற வாய்ப்புள்ளது.

குற்றப்பத்திரிகை எல்லாம் நீதிமன்றத்தில் தாக்கலான பிறகு, வழக்கு விசாரணைக்கு வரும், அதன் பிறகே குற்றவாளிகளுக்கு தண்டனை வழங்கப்படும். இவ்வழக்கு முழுமையாக முடிய எப்படியும் குறைந்தது இரண்டு வருடங்களுக்கு மேலாகலாம் எனவும் கூறப்படுகிறது!. வழக்கு முடிந்து குற்றம் நிரூபிக்கப்பட்டால் ஒவ்வொருவருக்கும் குறைந்தது 7 வருடம் சிறை தண்டனை கிடைக்கக்கூடும். ஆக வாழ்நாளின் பெரும்பகுதி ராசா, கனிமொழி, சரத் குமார், ஷாஹித் பால்வா உள்ளிட்டவர்கள் சிறையிலேயே கழிக்க நேரிடும்!.

'ஊழல் செய்பவர்கள் இவ்வழக்கைக் கண்டாவது பயந்து படிப்பினைப் பெறவேண்டுமென்பதே அனைவரின் விருப்பமும்!'.


- உமர் முக்தார் 

ஏன் வேண்டும் ஈழம் ?

Share

ஏன் வேண்டும் ஈழம் ?

• இலங்கை விடுதலை அடைந்தபோது தமிழர்களின் எண்ணிக்கை : 35,00,000.
• சிங்களர்களின் எண்ணிக்கை : ஒன்றரை கோடி.
• தற்போது தமிழர்களின் எண்ணிக்கை : 35,00,000.
• சிங்களர்களின் எண்ணிக்கை : இரண்டரை கோடி. 
• முப்பது வருட அகிம்சை வழி போராட்டம்.
• முப்பது வருட ஆயுத போராட்டம்.
• இரண்டு தலைமுறைகளை தாண்டி நடந்துவரும் உரிமைக்கான போர்.
• ஆசியாவிலேயே, நெடுங்காலமாக நடந்துவரும் ஒரே போராட்டம்.
• இதுவரை கொள்ளப்பட்ட தமிழர்களின் எண்ணிக்கை: 3,00,000.
• சொந்த நாட்டிலேயே அகதிகளாக வாழும் தமிழர்களின் எண்ணிக்கை: 50,000 - 1,00,000.
• இறுதி யுத்தத்தில், மூன்றே நாட்களில் கொள்ளப்பட்ட தமிழர்களின் எண்ணிக்கை: 30,000.
• உயிர் பலிகளுக்கு வேண்டும் நியாயம். 
• ஒடுக்குமுறைக்கு எதிராக, வேண்டும் நீதி.
• வாழ்வதற்க்கு வேண்டும் நாடு. 
• ஒரே லட்சியம்: ஈழம் 
• அடைவதற்கான வழி: போராட்டம்.
• எனவே, 

                       ...........தொடரும் இந்த போராட்டம்.

தமிழர்களே!

        நாம் இழந்துவரும், சுயநிர்ணய உரிமையை வென்றெடுக்க, போராட்டத்தை கட்டியமைப்போம்!

        உண்மையான சுயநிர்ணய உரிமை என்னவென்பதை ஒவ்வொரு தமிழ்நாட்டு, தமிழனுக்கும் உணர்த்துவோம்!

        உலகம் முழுவதும், உரிமைக்காக நடத்தப்படும் போராட்டங்களை, தீவிரவாதம் என்ற பெயரில் ஒடுக்கிவரும் ஏகாதிபத்தியத்தை எதிர்போம்!

        இதுவே உண்மையான விடுதலைக்கு வழி!

     

நினைவேந்தல்

Share

Share

மதுப் பழக்கம்

Share

மதுப் பழக்கம் - அதிகரிக்கும் விழுக்காடு 

                தமிழகத்தில் தெருக்கு தெரு திறந்துள்ள மதுக்கடைகளால், படித்த இளைஞர்களிடையே மதுப்பழக்கம் அதிகரித்துள்ளது. போதைக்கு அடிமையாகும் இவர்களுக்கு அளிக்கப்படும் கொடுமையான சிகிச்சைகளால், உயிரிழப்பும் நேரிடுகிறது. முழு மது விலக்கு மூலம்  மட்டுமே, மதுவால் சீரழியும் தமிழகத்தை வீழ்ச்சியில் இருந்து காப்பாற்ற முடியும்.

                 விடிந்ததும் அரசு மதுக்கடைகளில் நீண்ட வரிசையில் நிற்கும் மக்கள்! மதுவை அருந்தி விட்டு சுயநினைவு இழந்து சாலை ஓரங்களில் வீழ்ந்து கிடக்கும் கூலித் தொழிலாளிகள் !! மாநிலத்தில் ஆறாக ஓடும் மது கலாச்சாரத்தால்,  படித்த இளைஞர்கள் இடையே, அதிகரித்து வரும் மதுப்பழக்கம்.

             

 இப்படி தமிழகம் தள்ளாடிக் கொண்டிருக்கும் நிலையில், அண்மையில் நடத்தப்பட்ட ஆய்வு ஒன்றில்,  ஆண்டுக்கு 2 ஆயிரம் இளைஞர்கள் மதுப்பழக்கத்திற்கு அடிமையாகி வருவதாக அதிர்ச்சி தகவல் வெளியாகியுள்ளது. மேலும், பொது இடங்களில் மதுக்கடைகளை திறப்பது தொடர்பாக விதிகள் இருந்தாலும், அவை காற்றில் பறக்க விடப்படுவதால், பெண்கள் படும் வேதனைகளுக்கு அளவே இல்லை.  சமிபத்தில் நடந்த ஒரு சம்பவத்தை இங்கு குறிப்பிடுகிறேன்.
             
மதுப் பழக்கத்திற்கு அடிமையானவர்களுக்கு சில தனியார் நடுவங்கள்  சிகிச்சை அளிக்கின்றன. ஆனால், சிகிச்சை என்ற பெயரில் போதைக்கு அடிமையானவர்கள் இங்கு கடுமை தாக்கப்படுகின்றனர். இதனால் சிலர் உயிரிழக்கும் ஆபத்தும் ஏற்படுகிறது. மேலும், பல ஆண்டுகள் மதுப்பழக்கம் வீட்டின் அமைதியை சீர்குலைத்து விடுகிறது.

சென்னை கின்டியைச் சேர்ந்தவர் முகமதுரபிஃக். இவர் நீன்ட நாட்களாக மதுவிற்கு அடிமையாகி தன் வாழ்வை தொலைத்துவிட்ட நிலையில் உயிரையும் பறிகொடுக்கும் அபாயத்தில் இருந்தார். மதுப்பழக்கத்தால் இவர்  மட்டுமின்றி மனைவி மற்றும் குழந்தைகளும் பெரும் அவதிப்பட்டுவந்தனர். குடும்பம் படும் கஷ்டத்தைப் பார்த்து மது பழக்கத்தை நிறுத்திவிடலாம் என பல முறை முயற்சி செய்தும் பலன் இல்லை. இந்நிலையில் நண்பர் ஒருவர் மூலம் மறுவாழ்வு மையம் பற்றி அறிந்து அங்கு சென்று போதைப்பழக்கத்தில் இருந்து விடுபட சிகிச்சை மேற்கொள்ள முடிவுசெய்து அந்த மையத்தில் இனைந்தார்.

அங்கு சிகிச்சை என்ற பெயரில் மனிதர்களை மாட்டையடிப்பது போல் அடிப்பது, இருட்டு அறையில் அடைத்து வைப்பது, உணவில்லாமல் பட்டினி போடுவது என முற்றிலும் மனித உரிமைகளுக்க எதிரான முறையில் நோயாளிகள் நடத்தப்பட்டனர். அவர்கள் மேற்கொண்ட சிகிச்சையை தாங்கமுடியாத முகமது ரபிஃக் ஒரு வாரத்தில் பரிதாபமாக உயிரிலந்தார். 

மனம் திருந்தி மறுவாழ்வு வாழ நினைத்து சிகிச்சைக்கு சென்றவர் மரணித்து பிணமாக வீடு திரும்பினார். அவரின் மனைவியும் குழந்தைகளும் இப்போது நடுத்தெருவில் நிற்கின்றனர்.

தமிழகத்தில் முழு மதுவிலக்கை நடைமுறைப்படுத்த வேண்டும் என சமூக நலனில் அக்கறையுள்ள பலர், தொடர்ந்து குரல் கொடுத்து வருகின்றனர். இதனை ஏனோ அரசு காதில் வாங்கிக் கொள்வதே இல்லை. வருவாயை மட்டுமே கவனத்தில் கொள்ளாமல் தமிழகத்தின் எதிர்காலமான, இளைஞர்களின் வாழ்வை கருத்தில் கொண்டு மதுக்கடைகளை மூட அரசு முன்வர வேண்டும். இதன்மூலம் மட்டுமே நல்ல சமுதாயத்தை உருவாக்க முடியும்.

                                                                         மக்கள்  ஆனந்த் குமார்